الأخشاب تنقسم الى قسمين رئيسيين

اولا: الاخشاب الطبيعية ( زى الزان والارو والموسكى..الخ)

ثانيا: اخشاب مصنعة او اخشاب مسطحات( الكونتر وال إم دى إف والابلاكاج ..الخ)
1-الأخشاب الطبيعية:
  • خشب الموسكى pine wood

    خشب الموسكي
    خشب الموسكي

خشب الموسكى يُعد من ارخص انواع الاخشاب الطبيعة فى مصر وطبعا كل ما العقد كترت فيه سعره يقل اكتر وخاصة العقد الخبيثة اللى هى ممكن تقع منه بعد التصنيع وطبعا ساعتها هايكون شكل المنتج النهائى سىء للغاية.

يعنى مثلا لو تم تصنيع ضلف مطبخ من الموسكى ذو العقد الخبيثة وبعد كدة العقد وقعت طبعا شكل الضلفة هايكون بشع وهى مخرومة

طيب والواحد يعرف العقد الخبيثة من العقد الطيبة ( الحميدة) ازاى؟؟

العقد الخبيثة بتكون سودة جدا كأنها محروقة وحواليه فراغ بسيط بينها وبين باقى لوح الخشب

لكن العقد اللى مافيش منها خوف هى العقد الفاتحة زى اللى فى الصورة اللى فوق

دى صورة لكنبة مصنوعة من خشب الموسكى ولو تلاحظوا العقد اللى فيها بسيطة ومع الدهان تقريبا مش باينة بالعكس بتزيد الخشب جمال

ودى ترابيزة مطبخ بالكراسى من خشب الموسكى وبرضه العقد اللى فيها بتديها جمال

ويستخدم خشب الموسكى قليل العقد فى صناعة غرف السونا ولكن يفضل فى صناعتها الخشب العزيزى

ومن اشهر استخدامات خشب الموسكى فى مصر ملل السراير والمطابخ وبعض انواع الانتريهات والابواب

==========

  • الخشب الزان:

دة شكل الخشب الزان

خشب الزان
خشب الزان

ولو تلاحظوا ان لونه مائل للإحمرار شوية ومسامة ضيقة جدا ومافيهوش اى عقد

وخشب الزان مفضل جدا لاعتقاد الناس انه اقوى الانواع

وتلاقى الواحد يجيب الانتريه وفخور اوى انه من خشب الزان لانه خشب بيستحمل ويوقلك خد راحتك فى القعدة واتجعص على الاخر دة خشب زان ولا يهمك

يوجد نوعا اخر تقريبا اسمه مرانتى هو شبه الزان وللأسف مش اى حد يفرقهم عن بعض وبيستخدم فى صناعة غرف النوم وطبعا هو مش بقوة خشب الزان وبالتالى الغرفة لاتصمد كثيرا

طيب والمشترى العادى يعرف الفرق ازاى؟؟

بصراحة هو صعب لكن ممكن عن طريق سعر الغرفة اللى هاتشتريها سواء نوم او سفرة او انتريه

يعنى مثلا فى زماننا دة لا يمكن اى غرفة نوم مصنوعة من الخشب الزان تقل عن 10000 ج بأى حال من الاحوال وطبعا دة سعر رخيص جدا اللى انا بقوله دة وبالتالى لو غرفة نوم سعرها 7000ج او 8000ج تأكد انها مش زان او على الاقل مش كلها زان

  • خشب الآرو:
    خشب الارو
    خشب الارو

يتميز خشب الاّرو بالصلابة والمتانة والشكل المميز الفخم ويوجد منه نوعان خشب يوغوسلافي وهو الأرخص بسبب كثرة الرطوبة فيه , والاّرو الأمريكي وهو أغلى لقلة الرطوبة به .

خشب الارو من الاخشاب الصلبة المتينة والى كمان شكلها حلو وبتدى فخامة

يعنى لو عملنا باب من الموسكى والتانى من الزان والتالت من الارو هتلاقى افخم باب فيهم شكلا هوالباب الارو

خشب الارو نوعين

أرو يوغوسلافى ودة الارخص والسبب ان الرطوبة فيه اكتر

وأرو أمريكى ودة الاغلى لان رطوبته اقل

ويبدأ سعر الارو من 6000ج الى 10000ج للمتر المكعب

وبمناسبة المتر المكعب أحب اقولكم حاجة مهمة

ان لما الواحد يقول متر خشب الارو مثلا 600ج دة معناه المتر المكعب من الخشب وطبعا الكلام دة بينطبق على جميع انواع الاخشاب الطبيعية وبلغة الصنعة نسميه الخشب الماسيف

هانقول مثلاً

لما تيتجى تتفق مع نجار او مهندس عشان يعملك كرسى مثلا

ازاى تحسب كمية الخشب الموجودة فى الكرسى دة

مثلا رجل الكرسى ليها طول وعرض وارتفاع مثلا طول الرجل 5 سم وعرضها 5 سم وإرتفاعها 40سم

عشان نعرف كمية الخشب المستخدمة فى رجل الكرسى دة

هانحول السنتيمتر الى متر وتضرب الارقام اللى هاتطلع لك دى فى بعض هتلاقى الناتج اللى طلع لك 0.001ولما تضرب الرقم دة اللى هو واحد من ألف من المتر فى ثمن المتر المكعب للخشب الارو هانقول مثلا 6000ج الناتج النهائى هايكون 6ج يعنى سعر رجل الكرسى تساوى 6ج

وبالطريقة دى تقدر تحسب اى حاجة ومحدش يضحك عليك

  • خشب الماهجوني (موجنة) :

و موجنة هو اسم الصنعة لهذا الخشب والموجنة تنقسم الى موجنة مصبعة وفيها شكل الخشب أو القشرة على شكل اصابع طوليه وفي منه المفجر له فاجورة وهي تشكيلات في عروق الخشب ربانية الصنع والخشب الماهجوني لونه يميل للإحمرار ويستخدم في صناعة الاثاث والابواب .

  • الخشب العزيزي (pine wood ):

وهو من نوع الأخشاب الصنوبريه مثل الموسكي والبلوط ولكن سعره يفوق سعر الخشب الموسكي ولونه يميل الي الابيض .

خشب العزيزي
خشب العزيزي
  • خشب البلوط(ash wood ) :

وهو من نفس فصيلة الخشب الموسكي والعزيزي كما أنه يتميز بلونه الفاتح يميل الى الابيض و يدخل خشب البلوط في صناعة اّلات العزف العربيه بالإضافه لصناعة الاثاث.

خشب البلوط
خشب البلوط
  • خشب التك (teak wood ):

خشب شديد الصلابة اليافه قاتمه يقاوم الرطوبة بذلك يستخدم خشب التك في صناعة القوارب ومناضد المعامل.

خشب التك
خشب التك
  • خشب الجوز التركي ( walnut wood):

وهو من أثقل أنواع الأخشاب فهو خشب يغطس في الماء ولا يطفو مثل باقي الاخشاب وهو قوي جدا ومن أغلى أنواع الخشب ومقاوم للعوامل الجوية .

الجوز التركي
الجوز التركي
  • خشب الابنوس(ebony wood ) :

أصلب وأقوى الأخشاب مما يجعله صعب التشغيل كما إن الوان خشب الابنوس مختلفه فمنه الاحمر والاخضر والابيض الذي يميل للاصفرار والبني والاسود الداكن ويستعمل في أشغال القشرة وهو أغلى الانواع وأثمانها المعروفة كما انه نادر الوجود .

الابنوس
الابنوس
  • خشب الورد (rose wood) :

من الانواع الخشبيه الغاليه جدا وتأتي استخداماته في الاثاث قليلة جدا لكن ممكن يستخدم في التحف الخشبيه.

  • خشب البليسندر(palisander wood ):

خشب البليسندر قليل الاستخدام في القشرة لأن قشرته تسمى قشرة زفرة وذلك لإعتلائها مواد زيتيه طبيعية مما تؤثر بالسلب على الدهانات .

 

 

  • عيوب الخشب وطرق معالجتها :

العيوب الطبيعية: العقد, الشروخ بكل انواعها العميقة والعرضية والطوليه , التقوش , الالتواء , الاعوجاج .

عيوب التأثيرات الخارجية : التسوس , التحلل , العفن والذي تسببه الرطوبة , مع قابليته للاحتراق, والانكماش ومن الممكن ان يتمدد اذا جفف بطريقة خاطئه ,بالاضافه الى النقط البيضاء بسبب الفطريات .

تتم معالجة هذه العيوب باستخدام الزيوت والمحاليل المشمعية لحمايته من الفطاريات التي تسبب النقط البيضاء ويستخدم القطران لحماية الخشب من الرطوبة , والفينول لحمايته من تأثير الاحماض , ويستخدم الفوسفات لحمايته من الحريق فهي تعمل على تأخير الحرارة من الوصول الي الخشب