مقالى عن الاستيراد والتصدير

مقالى سيكون عن التصدير والاستيراد
الحقيقة سابدا مقالى بصعوبات كثيره قد تقابل المصدر فى حياتة العمليه عارفين من وجهة نظرى الصغيره ارى ان اصعب شىء قد يقابل المصدر هو ان يقابله اشخاص يتكلمون كثيرا ولا يفهمون اى شىء ويصدروا الوهم لاشخاص ليس لديهم الخبره الكافيه وبالتالى يحدث شيئان اما ان يخسر كل ماله او ان يكون الشخص الاخر نصاب ومن وجهة نظرى ليس هناك فرق. ومن هذه المقدمه سأحكى لكم حكاية حقيقيه عن شخص اراد ان يجرب ان يصدر قى بداية حياتة العملية وللأسف تقابل مع الشخص الخطأ من النوع الاول الذى يصدر الوهم بانه يفهم كل شىء اه نسيت اقولكم ان الشخص اللى حب يصدر فى بداية حياتة هو انا وده كان من 14سنه تقريبا اردت ان اجرب التصدير ولكن كان من خلال الغير لان لم يكن عندى بطاقة تصديريه فى هذا الوقت .الحقيقة حكايتى مضحكة للغاية وهى ان الشخص الذى عرض فكره تصدير الوهم تخيلو حنصدر ايه ولمين تخيلو .حنصدر تمر واجعلكم تنقلبو على الارض من الضحك عندما اقول لكم ان احنا حنصدر التمر للسعوديه ومن هنا تبدا المغامره بتاعتى مع هذا الشخص الغبى المتخلف او قولو زى ما انتم عايزين الاول بدانا تجميع المنتج واللف على الاماكن اللى بتشتغل فى موضوع التمر سواء الناشف او الطرى المهم الراجل بصراحه رايحنى اخر راحه قالى بقولك ايه سبلى الموضوع ده من اوله لاخره وطبعا اخوكم لسه غشيم ميعرفش حاجه اخوكم طبعا اللى هو انا وطبعا وافقت وقولتله يعنى انت فاهم كل حاجه بخصوص الموضوع ده قالى ايه باشا اللى انت بتقوله ده عيب دى مش اول مره اصدر فسالته هو انت عندك بطاقة تصديريه فرد عليا بطاقه اية يا باشا بس سيبها على الله كله تمام ههههه طبعا قولتله تمام يا معلم يلا بينا وبدا المعلم يلم البضاعة ويدخلها المخزن اول باول كده والله يا جماعه الراجل بذل مجهود خرافى الحقيقه فى فن التعبئه الحقيقة على اعلى مستوى مواصفات عالميه فى فن التعبئه. الحقيقه تفنن فى تعبئة التمر فى كراتيين الشيبسى والمياه المعدنية شىء جميل جدا اخر حاجة الحقيقة يعنى ودى كانت بداية المجهود الشاق للمعلم الخبير فى التصدير وهو تعبئة التمر فى كراتين الشيبسى والمياة المعدنيه فقولتله اية ده يا باشا هو ينفع كده قالى يا باشا انا المسئول متشغلش بالك متقلقش. وخلو بالكم اوى من كلمة متقلقش لان دى كلمة السر فى حياتى كلها المهم ده بالنسبة لتعبئة التمر بعد كده دخلنا على موضوع دخول البضاعة فى كونتينر وطبعا الباشا المعلم عمل ايه اتفق على كونتينر يجى يحمل من المخزن بتاعى وطبعاالحسابة بتحسب تخيلوا كان المخزن فين فى البحيره فى مكان وطريق زى الزفت ميدخلوش عربية 128 مش كونتينر وطبعا سالت المعلم قولتله بس كدة ازاى هينفع يدخل عندى ده صعب وطبعا كان الرد متقلقشى وجاء الكونتينر يا اخوانى ودخل الطريق اللى زى الزفت ونبدا هنا المغامرة الشيقة الطريق علية عمدان نور واسلاك طبعا .وطبعا على طول الطريق الكونتينر عمل الواجب وزياده كل اسلاك الكهرباء تم تقطيعها بالكامل والحقيقة دى كانت فرصة جيده عشان نساعد برده البلده فى ترشيد الطاقة واستمرت المغامره لاكثر من 6ساعات متواصله حيث انا الكونتير كان سيقع فى الترعة والحمدلله ربنا ستر وطبعا دخل الكونتينر وثار السائق وقال ازاى تدخلونى مكان زى ده وطبعا خرج السائق من المكان باعجوبه وكان هيسيب البضاعة ويمشى لولا راضينه طبعا بس طبعا كان من رابع المستحيلات ان هو يحمل من المخزن المهم اتفقنا ان هو يستنى على الطريق بره واحنا هننقل البطاعة لحد عنده وقولت للمعلم مش قولت ليك مش هينفع رد عليا وقالى هو اللى غشيم بص بقولك ايه متقلقش وطبعا بدانا ننقل البضاعة اللى متعبية فى كراتين الشيبسى والمياة المعدنيه تخيلوا على اية على عربيات كاروه اللى هى عر بيه بحمار يعنى يا ريت حتى بحصان وده طبعا عشان محدش هيدخل الطريق ده الا الحمار المهم ونقلنا البضاعه وانا كنت عند المخزن وللاسف هو كان عند الكونتينر عشان يظبط البضاعه فى الكونتينر وخلوا بالكم من كلمة يظبط دى عشان هتكلم فيها بعد شويا المهم نقلنا البضاعة وخلاص قربنا نخلص نقل وكانت المفاجأه جالى تليفون من الراجل االى شغال معايا وقالى الحق البضاعه ملهشاش تصريح من الصحه وملهاش اوراق معده للتصدير جريت وروحت عند المعلم عند الكونتينر وقولتله ازاى يا عم كده وكان طبعا اليوم ده يوم جمعه يا اخوانى الاعزاء والكونتنر واقف والحسابه بتحسب قولت ليه وبعدين رد عليا وقالى متقلقش وبينى وبينكم بدأت اقلق شويا المهم اقدرنا الحمدلله نتصرف روحنا طبعا ودفعنا مبلغ محترم عشان نخلص الموضوع ده بسرعه عشان احنا يوم الجمعه وطبعا من غير معاينة البضاعة ولا حاجه خلصنا كل الاوراق وكله تمام المهم نسيت اقول ليكم ان الكوتش بتاع الكونتينر فرقع ودى معلومه للعلم فقط المهم وخرج الكونتينر وراح للشركة المصدره للشحن وبعد الوصول اتصل بيه المصدر وهو زعلان جدا جدا وقالى ده كلام برده قولت ليه هو في ايه قالى العمال فتحو الكونتنر والكراتين كلها وقعت عليم وبعدين فيه فى الدنيا حد يعبئى بضاعه فى كراتين شيبسى ومياة معدنيه فطبعا مكنتش عارف ارد اقول ايه الحقيقة المهم اتأسفت وقولتله معلش اتصرف وانا حراضى العمال ولو فيه حاجه زياده انا مستعد والراجل تفهم الحمدلله المهم كلمت المعلم الخبرة وقولت ليه انا مش قولتلك الكلام ده من الاول فرد وقالى انا كنت عايز اوفر فى المصاريف قولت ليه مصاريف ايه ده انت كلفتنا كتير المهم قولت ليه وبعدين انا كده بدات اقلق رد عليا وقالى خلاص الموضوع قرب ينتهى انا مسافر السعوديه عشان البضاعه ومتقلقش .اه بمناسبة ان هو رايح السعوديه اصل هو بيشتغل هناك المهم وراحت البضاعه السعوديه وهنا طبعا بدأت اقلق بجد المهم مرت ايام واتصلت بالخبره فى السعوديه وسالته البضاعه اخبارها ايه قالى البضاعة وصلت بس بنخلص الاجراءات ومن ساعتها والاجراءات لسه مخلصتش. وطبعا دى كانت حكايتى مع التظبيط اللى علمتنى حاجات كتير وخلتنى اصمم ان انااجتهد واعمل كل حاجه بنفسى ومااعتمدش على اى حد وان انا اجمع اكبر قدر من المعلومات وادرس واتعلم وامارس عملى بنفسى واسافر واعمل دراسة للاسواق واشوف اللى محتاجه وايه اللى مش محتاجه واعرف القوانين الخاصه بالتجاره الدوليه وشركات الشحن والجمارك والضرائب والحمدلله تعلمت من كل الاخطاء اللى وقعت فيها وحولتها شىء ايجابى ارجو ان تكون حكايتى جيده للاستفاده منها بقدر المستطاع